نحلم.. مرة أخرى..

نحلم نلعبو و نجري وراك ** و خوفي عليك من يوم الهلاك

نحلم نلعبو و حلمي قديم ** و لاش العبد متكبر سقيم

و لاش اللعب في العمر العديم **تحت اللحد لا منهو حذاك

و للي كفر بالمولى العظيم ** يوم القارعة يوم الهلاك


نحلم نلعبو و حلمي حكايه ** بداية درس و ختام القرايه

لا إلاه إلا الله مولايا ** عبدك تايب و طالب رضاك

منين كتبت تبعت الروايه ** ريت الفكر.. تلفتا خطاك


نحلم نلعبو و نجري وراك ** و خوفي عليك من يوم الهلاك

نحلم نلعبو و نجري وراك ** ريت الفكر.. تلفتا خطاك


ريت الفكر.. تلفتا خطاك

ريت الفكر.. تلفتا خطاك


كمال الهادي

2010, June 17

البنوتة

كان يحلم ببنوتة... فكتب هذه الأبيات..

هاالسنين قلبي محنته وعذابــــه *** واللي خطف صوابــــه
مشتاف بنوتة تقولا بابا

مشتاف في بنوتة *** سمحة ظريفة ملَيّحة خرخوطة
نعلق عليها خُمْستين وحوتة *** والحوش يتسكّر عليها بابه
لا تخش بحر الخايبة لا تفوته *** ولا ولد أمه يمسها بسبّابه
وسط العيون مسكنها *** و هذوب عيني أرضها ووطنها
نظلل عليها مِالهوى نحصَّنها *** ونشرب حذاها الفرح عزّْ شرابه
لا كان ضحكت ضحكها يزيّنها *** وكان حد كدّرْها تنادي بابا
كلمة ذهب محلاها *** كي الوذن تسمعها نذوب معاها
ننسى حياتي ودنيتي فْملقاها *** نحلّق معاها طير وسط سحابا
ونحس في قلبي انتفض وجاها *** فرحان متفرهد بكلمة بابا
نطمان كي نلاقيها *** ونترك الدنيا لا لغت ونجيها
نعَدِّي سويعة بجنبها انلاغيها *** ننسى الزمان وقسوته واتعابه
ولا بديت متكدر نروح ليها *** مالباب تعرضني حبيبة بابا
تجري قداي تُحْضُنِّي *** وتبوسني تمحي المتاعب عني
تفتش جيوبي بكفها المحنِّي *** وتقول أش جبت لبنيتك بابا
نقولها عزيزة يا قطيعة مني *** كل شي جبتا يا قليب بابا
كل شي بنتي شهاتا *** وكل شي راتا بعينها وحبّاتا
جبتا لبنتي وفيدها حطاتا *** ولا ثم شي يغلى على المصوابة
حتى القمر لو كانها طلباتا *** نطلع نجيبا مالسماء وسحابه
نطلع نجيبا لبنتي *** يا روح روحي ويا عزيزة إنت
مْلَكْتِ الخواطر والجواجي سكنت *** وزينك قداي ما توصفه كتّابه
وكانك عَلَيْ يا غالية ادّلّلْتِ *** دلالك قدايا شهد صافي شرابه
دلالك عزيّز عندي *** وما نقد نرفضلك حويجة كبدي
لو كان نلقى نسكنك يا سعدي *** في قصر عالي مشيدا على سحابه
ولا فوسط القلب تبقي بعدي *** يا روح بابا وصحبته واصحابه
فراحك قداي منايا *** وضحكة افّيمك هي بلسم دايا
نطلب من العالي العزيز مولايا *** يخلّيك للوالد ربيع شبابه
يا رب بارك كبدتي و ضنايا *** بجاه النبي الأكرم و جمع صحابه
بجاه النبي خليها *** وفي أمها بارك وفي امّاليها
يا رب طمّنِّي العزيزة عليها *** وبارك فرزقي وافتحلِّي بابه
وفي العمر لا تكدر قليبي عليها *** واجعل الخير فاقدامها جلابه

هاالسنين قلبي محنته وعذابــــه *** واللي خطف صوابــــه
مشتاف بنوتة تقولا بابا

جمال الهادي

نحلم ..

..قرأت "نَحْلَـمْ نَلعبُـو" (قصيد بالعاميّة) لمحمد الخامس بلطيف

فأعجبني..

فأحببت أن اهدي له حلما آخر..

-----

نحلم نلعبو و نجري وراك ... يدقّ القلب عل دقّة خطاك

***

نحلم نلعبو و حلمي يدوم ... و حلمي صحو ماهو حلم نوم

و لاش يحنّ للبارح اليوم ... و لاش نحنّ ؟ ساكنّي غلاك

نحلم نلعبو و نجري وراك

***

نحلم نلعبو فضوّ القمر ... و فيك نضيع ضيّعني الشّفَرْ

كواني البعد و رماني سفر ... عليك رحلت و الخاطر معاك

نحلم نلعبو و نجري وراك

***

نحلم نلعبو تحت المطر .. تَرْوَى الأرض و يطيب الثمر

يرِفّ القلب لا طيفك خطر .. تروى العين من طلّة بهاك

نحلم نلعبو و نجري وراك

***

نحلم نلعبو و حلمي غلبني .. بياض الشّيب عل صغري نشدني

منين الحلم لقداكم جبدني .. هَزّ الرّوح تَتْرَوّحْ قداك

نحلم نلعبو و نجري وراك

***

نحلم نلعبو و نجري وراك ... يرقّ اللحن و يدندن هواك

كمال الهادي

2009 November